29. salvegera pêngava 15'ê Tebaxê, li herêma Bazyan a Silêmaniyê bi pêşengiya Partiya Çareseriya Demokratîk a Kurdistanê (PÇDK) ve bi şahiyeke girseyî hat pîrozkirin.

Pîrozbahiya pêngava 15'ê Tebaxê, duh êvarê bi beşdariya sedan kesî li nahiyeya Bazyan a bajarê Silêmaniyê pêk hat. Pîrozbahiya ji aliyê PÇDK'ê ve hat organîzekirin, bi deqeyeke rêzgirtinê destpê kir û dûre Hevseroka PÇDK'ê Necîbe Omer 15'ê Tebaxê û Cejan Remezanê li tevahiya gelê Kurd pîroz kir.

Hevseroka PÇDK'ê Omer da xuyakirin ku bi saya têkoşîna bi 15'ê Tebaxê re destpê kiriye gelê Kurd bi hebûna xwe hesiyaye û destnîşan kir ku PKK'ê bi têkoşîna xwe ya çekdarî ya 29 salan, gelê Kurd ê li çar parçeyên Kurdistanê xwestiye biparêze û parastiye.

Hevseroka PÇDK'ê Necîbe Omer da xuyakirin ku bi kombûna bi hezaran keç û xortên Kurd ên ji çar parçeyên Kurdistanê re şoreşa 15'ê Tebaxê şoreşeke netewî ye. Omer diyar kir ku tevgera azadiya gelê Kurd PKK tevgereke demokratîk û aştîxwaze û ji bo azadiya netewa Kurd û rizgariya jinê ya ji pergala deshilatdariyê, têdikoşe.

Di dawiya axaftina xwe de Hevseroka PÇDK'ê Necîbe Omer got, "Têkoşîna 15'ê Tebaxê têkoşîneke netewî û demokratîk e. Em dibînin ku têkoşîna Rêberê Gelê Kurd a ji bo avakiirna Yekitiya Netewî di asta herî bilind de ye. Lewma pêwîste û erk e ji Kurdekî re, xwe ji bo avakirina dîwarê Yekitiya Netewî, berpirs bibîne."

Di pîrozbahiyê de, hunermend Comerd, Celal Hewramî, Hêmin Arîf, Denîz deman û hunermendên ciwan derketin ser dikê û berhemên xwe pêşkêş kirin. Girseya gel jî ji ber stranên bi coş ên hunermendên krud govend gerand û pîrozbahiya xwe heta derengiya şevê dewam kir.