Meclîsa Jinan ya BDP’a Êlihê têkildarî kongreya awarte ya BDP’a Êlihê civîna gel li dar xist. Di civînê de Parlementer Ayla Akat xwest gelê Êlihê bi girseyî beşdarî kongreyê bibe ku peyamek xurt ya siyasî ji ew kesên ku fermana operasyonan didin, bişînin.

Meclîsa Jinan ya BDP’a Êlihê, têkildarî kongreya awarte ya BDP’a Êlihê ku dê di 3 Sibatê pêk were, li salona dawetê ya taxa Baglarê civîna gel li dar xist. Di civînê de Parlementera BDP’ê ya Êlihê Ayla Akat, endamê meclîsa jinan û bi sedan kes amade bûn. Jinên ku bi kincên herêmî beşdarî civînê bûn, ji bo bîranîna kesên di têkoşîna azadiyê jiyana xwe ji dest dane deqîqeyek rêz girtin û dirûşmên “Şehîd namirin” qîr kirin.

Di civînê de Parlementera Êlihê Ayla Akat axivî; têkildarî pêvajo û kongreyê de agahî da. Akat da zanîn ku, dema ew çûbûn Îmraliyê û bi Rêberê Gelê Kurd Abdullah Ocalan hevdîtin dikir, li Lîcê pevçûn qewimî û di encamê de 10 gêrîlayên HPG’ê jiyana xwe ji dest dabû. Akat anî ziman ku, piştî pevçûna Lîcê, li Çelê, Qendîl, Parîs û gelek deverên cûda pevçûn û operasyon dewam kiriye û di van bûyeran de bi dehan kesan jiyana xwe ji dest dane. Akat êrîşa ku li hemberî 3 jinên siyasetmedar ên Kurd li Parîsê pêk hat, bi hevkariya hêzên navneteweyî pêk hatiye û komkujî wekî komploya navneteweyî bi nav kir.

Akat destnîşan kir ku, meha yekemîn ya salê ji bo gelê Kurd bûye meha komkujiyê. Akat da zanîn ku, ew bejna xwe li ber têkoşîna her sê jinên Kurd ditewîne û got ew dê wekî jinên Kurd ala têkoşîna hevalên xwe li cihê maye dê hildin û vê alê bilind bikin.

‘JIBER KU EM GELIN Û EM MAFDARIN'

Akat bal kişand ser operasyonên siyasî û bibîr xist ku ji ber operasyonan niha li Êlihê ji bilî 2 kesan tu kes di rêvebiriyê de nemaye. Akat wiha got: “Ji ber ku em em gelin û em mafdarin. Kes nikare vîna me bigire. Em di salên 1990’î de dihatin qetilkirin. Lê niha jî bi operasyonê siyasî dixwazin me biçewisînin. Lê îro dewlet winda kiriye. Tiştek wisa qet ne pêkane ku em xilas bibin.” Akat anî ziman ku, kongreya ku dê li dar bixin kongreyek dîrokî ye û diyar kir ku, gelê Êlihê bi beşdarbûna girseyî ya kongreyê dê peyamek xurt a siyasî bişîne Enqereyê ji bo kesên ku fermana operasyonan didin.

Piştî civîna li vir, bi heman armancê li Mala Gel ya Mehmet Sîncar a li Taxa Perolkentê jî civîn bi welatiyên taxê re hate girtin.