Berfa ji duh êvarê ve li Bakurê Kurdistanê bariya, jiyan tevizand. Rêya bi sedan gundan li çûn û hatinê, hat girtin. Ji ber berfa ji duh êvarê ve dibare, rêya 462 gundên Agiriyê asê bû.

Li Îdir, Qers, Mûş, Bêdlis, Wan û Colemêrgê rêyên gundan ji ber berfê xetimîn. Meteorolojiyê ragihand ku barîna berfê dê dewam bike.

Barîna berfê li Îdirê rêya 50 gundan, li Qersê jî rêya 22 gundan li çûn û hatinê girt. Li navenda bajarê Mûşê berfê 7 cm, li qadên bilind ên bajêr jî 20 cm erd girt. Têkiliya bi 9 gund û 22 mezrayên li herêmê bi zehmetî tê danîn. Bi rêya bejahî ya Mûş-Pasûrê hewl tê dayîn bi hin gundan re têkilî were danîn. 

Li Bêdlisê berfa dijwar bandoreke neyînî li jiyana rojane kir. Ji ber berfê rêya 16 gundan li çûn û hatinê, xetimî. Ekîbên rêyên bejahî jî xwê li rêyên Bêdlis-Tetwan, Bêdlis-Mûş û Bêdlis-Amedê direşînin.

Li Wan û Colemêrgê jî berf bi bandoreke mezin dibare. Li navenda herdu bajaran berf û baran, li cihên bilind ên bajaran jî ji serê sibê ve berf dibare.

Di daxuyaniya Muduriyeta Herêmê ya Meteorolojiyê de hat ragihandin ku rewşa nebaş a hewayî ya bi ewr û berfê dê dewam bike û hişyarî hat dayîn ku ber destê sibê û êvarê dibe erd qeşa bigire û mij dakeve herêmê.

Pispor her wiha welatî ji ber jehrbûyîna ji sobe û gaza xwezayî hişyar kirin. Wekî din ji ber qeşagirtina rê jî pisporan ji welatiyan xwestin tedbîrên xwe di rê de bigirin.