Bi hezaran kes, ji bo ji nû ve çêkirina "Goristana Şehîdan a Egîd Sûrûç" li gel astengiya polîsan jî xwe gihandin Çiyayê Bagokê.

Bi pêşengiya Rêxistina BDP'ê ya Mêrdînê bi hezaran kes, ji bo ji nû ve çêkirina "Goristana Şehîdan a Egîd Sûrûç" ketin ser rêya Çiyayê Bagokê. 

Bi hezaran kesi li qada Girnawas'ê ji aliyê polîsan ve hatin rawestandin. Li qada behsa mijarê maşînên zirxî yên bi tîpa TOMA û Akrep, polîsên taybet hatin sekinandin û nuqteya kontrolê hat danîn.

Tevî Parlamenterê BDP'ê yê Mûşê Demîr Çelîk, rêveberên BDP'ê yên bajar û navçeyan, şaredarên herêmê û bi hezaran welatî, li nuqteya lêgerînê ya polîsan hatin rawestandin.

Piştî hevdîtina Parlamenterê BDP'ê yê Mûşê Çelîk li gel polîsan, hat ragihandin ku polîsan anîne ziman ku ewê li wesayîtan bigerin û dûre destûra derbasbûnê bidin wan.

Piştî lêgerînên hatin kirin, girseya gel rêya xwe dewam kir û xwe gihand goristana li Çiyayê Bagokê. Girseya gel bi tûgla û çîmento goristanê ji nû ve çê dike.

Leşkerên Tirk, di şeva 1-2'ê Îlonê de goristana ku tê de zêdeyî 40 cenazeyên gerîla hatibûn veşartin xera kiribûn û cenazeyê gerîlayê HPG'ê Ahmet Ûgûrlar (Egîd Sûrûç) revandibûn.