Baskê Arjantînê yê Tevgera Ciwanan a Che Guevara di Kongreya xwe ya 8. de biryar da biçe serdana gerîlayên HPG'ê. Tevgerê ji bo azadiya Rêberê Gelê Kurd Abdullah Ocalan û girtiyên siyasî yên li Tirkiyê dest bi kampanya îmzeyan kir.

Baskê Arjantînê yê Tevgera Ciwanan a Che Guevara, berî çend rojan li Arjantînê Kongreya xwe ya 8. lidar xist.

Di daxuyaniya piştî kongreyê de hat gotin, "Em têkoşîna hevalên PKK'yî dimeşînin ji nêz ve dişopînin" û hat destnîşankirin ku weke Tevgera Ciwanan ji bo azadiya Rêberê Gelê Kurd Abdullah Ocalan û hemû girtiyên siyasî yên li Tirkiyê, dest bi kampanya îmzeyan dikin.

Ji bo kampanyayê navê; "Ji bo azadiya Ocalan li Emerîka Latîn 2 milyon îmze" hat lêkirin.

Der barê kampanyayê de hat gotin, "Emê vê kampanya îro em didin destpêkirin li her devera Arjantînê belav bikin û bi şiyara 'Azadî ji Ocalan re, aştî ji Rojhilata Navîn re, ji bo tevahiya cîhanê şoreş û sosyalîzm' bimeşînin."

Di kongreyê de biryar hat dayîn, gerîlayên Hêzên Parastina Gel (HPG) werin ziyaretkirin.

Tevgera Ciwanan her weha destnîşan kirin ku ew bi têkoşîna gelê Kurd a li Rojavayê Kurdistanê serbilind û bi rûmet in.