Endamên Desteya Bilind ya Kurd duh serdana bajarê Silêmaniyê yê Başûrê Kurdistanê kirin û di demjimêr 14:00’an de li Hotela Balasê li ser rewşa Rojava û civîna Cenevre-2 semînerek dan.

Duh endamên Desteya Bilind ya Kurd Îlham Ehmed, ji Rêveberiya PYD’ê Xerîb Hiso û Sekreterê Partiya Çep Mihmed Mûsa serdana bajarê Silêmanî yê Başûrê Kurdistanê kirin. Di heman rojê de di demjimêr 14:00’an de li Hotela Balasê li ser rewşa Rojavayê Kurdistanê û civîna Cenevre-2 semînerek dan.

Di semînerê de endamê Parlementoya Başûrê Kurdistanê Salar Mehmud û gelek mêvanên din jî amedebûn.

 Di semînerê de endama rêveberiya Desteya Bilind Îlham Ehmed axivî û got: “ Rojhilata Navîn di nava veguherînên bingehîn de ye û helbet Sûrye jî di nava van guherînan de cihê xwe digre, ji lewma li Sûrye kîjan hêz bikaribe bi ser bikeve ew dikare li Rojhilata Navîn siyaseta xwe bide meşandi” û wiha pêde çû: “Li Sûrye hindek xet hatine diyarkirin. Xetên dewletên paşeverû ên ku di herêmê de bisalaye hertim hakîmbûye, ew ên herî zêde di nava berxwedanê de ne û nahêlin ku guhertin çêbibin.” Ehmed da diyarkirin ku; “Xetekjî ji derve de li ser herêmê êrîşan destpêdixe û dixwaze di hundir de bi xetek nû herêmê tenzîm bike, ew jî bi rengê îslamiye û weke baskekî derdikeve pêş”. Îlham Ehmed balkişand ser van xususan û got: “ Ya din jî xeta siyaseta demokratîke ku xwe ji aliyekî din de tekoşîn dike û li berxwe dide û bi şêwazekî tekoşîna xwe dide meşandinj. Lewma Sûrye niha qada şer a herî dijware. Kesên ku li ser Sûriyeyê hesab dikin û digotin, wê Sûriye di demeke nêz de zelal bibe ew hesab hemû vala hatin derxistin”.

Di heman demê de Sekreterê Partiya Çep ya Kurd Mihemed Musa da diyarkirin ku; “Gelê Kurd di dîrokê gelekî zulm û zordarî dîtiye, her wiha ger niha di qonaxa şoreşbûyînê de ye ew ji ber ked û xwîna ku daye ye. Gelê Kurd bi ked û tekoşîna ku daye, ji ber wê ye ku em pêngavên şoreşbûyînê jiyandikîn. Gelê Kurd ev bi xwîna ku rijandiye bûye hêvî û hêviya gelê Kurd li herçar parçeyên Kurdistanê.”

Rêveberê PYD’ê Xerîb Hiso jî axivî û da diyarkirin ku, “Em di qonaxeke gelekî girîng,hesas û nazik re derbas dibin. Lîstikên ku li ser me tên meşandin ez dikarim bêjim ku li ser Rojhilata Navîn nayên lîskandin û di xwazin bi van lîstikan me bikin destikê kêrê di Rojhilata Navîn de û me tune bikin.”

Di dawiyê de jî endamê parlementoya Başûrê Kurdistanê Salar Mehmûd ku beşdarî semînerê bû sipasiya xwe ji bo desteya bilind kir û got: “Em gelek kêfxweşin ku ev peyamên di derbarê şoreşa Rojava de, bi rêya desteya bilind digehe gelê me li Başurê Kurdistanê û got: “Ez weke endamê Parlementoya Başûrê Kurdistan Salar Mehmûd ez hêviyê zû bûyîna şoreşê ji bo gelê me ê Rojavayê Kurdistanê dixwazim û silav û rêzên xwe ji bo malbatên cangoriyên şoreşa Rojavayê Kurdistanê dişînim û bejna xwe li ber wan ditewînim.”

Di dawiyê de jî Salar Mehmûd bi vangotinan wiha dawî li axaftina xwe anî: “Şoreşa Rojava îro be an sibe be wê bi serbikeve û hêvîdarim hemû bi şeref beşdarî şoreşa Rojavayê Kurdistanê bibin û em bi xwe li herêmê Kurdistanê bi hemû hêza xwe alikariya gelê xwe ê Rojavayê Kurdistanê dikin.”