Ji bo rakirina qedexeya PKK'ê ya li Elmanyayê ku 20 salên xwe tijî kir, di 16'ê Mijdarê de wê li paytext Berlînê meş û mîtîngeke navendî were lidarxistin. Tevî Kurdên li Elmanyayê dijîn, dê rêxistinên civakî yên sivîl û kesayetên Elman jî bixwazin dawî li krîmînalîzasyona li hemberî Kurdan bê anîn û neheqiya qedexekirina PKK'ê biqîrin.

Ji bo rakirina qedexeya PKK'ê ya li Elmanyayê ku 20 salên xwe tijî kir, di 16'ê Mijdarê de wê li paytext Berlînê meş û mîtîngeke navendî were lidarxistin. Xwepêşandan ji aliyê saziyên civakî yên sivîl ên Elman ve tê organîzekirin û wê bi çalakiyê re bang li hikûmeta Berlînê were kirin ku piştgiriyê bide pêvajoya aştî û çareseriyê û dawî li polîtîkaya krîmînalîzekirina Kurdan bîne.

Di 26'ê Mijdara sala 1993'an de Wezîrê Karên Hundir ê hikûmeta Helmût Kolh Manfred Kanther, bi bulteneke taybet a ji aiyê dozgeriya federal ve hat amadekirin ragihand ku PKK li Elmanyayê hatiye qedexekirin. Bi qedexeyê re bi dehan komele û saziyên Kurd hatin girtin, polîtîkayên krîmînalîzekirinê yên li hemberî aktîvîstên Kurd bi rêk û pêk ketin dewrê.

Di 20. salvegera destpêkirina qedexeyê de gelek saziyên civakî yên sivîl û rêxistinên mafên mirovan ên Elman, li paytext Berlînê xwepêşandaneke navendî lidar dixin. Meş wê di 16'ê Mijdarê saet di 11:00 de li meydana Alexanderplatzê destpê bike û li nêzî Meclîsa Federal mîtîngekê bê lidarxistin.

'BILA QANÛNA 129B LI DIJÎ KURDAN NEYÊ BIKARANÎN'

Di banga saziya bi navê "Tatort Kurdistan" a ji aktîvîstên Elman pêk tê û amadekarê çalakiyê de hat gotin, ku divê qedexeya PKK'ê tavilê bê rakirin. Di daxuyaniyê de pêvajoya aştî û çareseriyê ya li Tirkiyê ku bi banga Rêberê Gelê Kurd Abdullah Ocalan re di Newrozê de destpê kir hat bibîrxistin û ji Elmanyayê hat xwestin ku di vê pêvajoyek de roleke erênî bileyze.

Di daxuyaniyê de hat bibîrxistin ku ji ber xala 129b ku weke "qanûna antî-terorê" tê naskirin, gelek aktîvîst û siyasetmedarên Kurd ên li Elmanyayê hatine girtin û hat gotin, "Divê dewleta Elman dest ji zextên xwe yên li hemberî siyasetmedarên Kurd berde." Di bangê de bal hat kişandin ser şoreşa li Rojava û hat destnîşankirin ku têkoşîna azadiyê ya Kurd ne tenê ji bo Kurdan ji bo demokratîkbûyîna tevahiya Rojhilata Navîn têdikoşe û hat xwestin ku Ewropa vê rastiyê bibîne.

Li gel saziyên Kurdan, hin sazî û parêzvanên mafên mirovan ên piştgiriyê didin xwepêşandanê wiha ne:

Komîteya Demokrasî û Edaletê, Diyalog Kreîs, Tevna Xebatê ya Aştiyê, IPPNW, DFG-VK, Lîga Mafên Mirovan a Navneteweyî, Yekitiya Huqûqnasan a ji bo Mafên Mirovan û Demokrasiyê li Ewropayê (EJDM) Yekitiya Huqûqnasên Demokratîk ên Elman, Konseya Aştiyê ya Federal, MAF-DAD, Prof.Dr. Mohssen Massarrat, Prof.Dr. Ûlrîch Gottsteîn, Dr. Gîsela Penteker, Prof. Armîn Rîeser, Prof. Andreas Bûro, Prof. Norman Paech, Clemens Ronnefeld, Dogan Akhanli.