Êrîşên çeteyên dijminê mirovahiyê DAIŞ ên li hemberî Kantona Kobanê, li bajarê Helepçe yê Başûrê Kurdistanê bi meş û daxuyaniyekê hatin şermezarkirin.

Bi armanca şermezarkirina êrîşên DAIŞ'ê yên li hemberî Kobanê, duh ber êvarê saet di 15:30 de li bajarê Helepçeyê, bi pêşengiya Rêxistina Ciwanên Welatparêz a Kurdistanê, Rêxistina Jinên Azadîxwaz a Kurdistanê û Partî Çareserî Demokratî Kurdistan meşek hat lidarxistin.

Meşê bi beşdariya dehan kesan ji bazarê destpê kir û heta navenda bajêr dewam kir. Li dû meşê daxuyaniyek hat xwendin û êrîşên li ser Kobanê bi tundî hatin şermezarkirin. Di dewama dxuyaniyê de de banga yekîtiya neteweyî li tevahiya gelê kurd hate kirin û hate gotin: "Armanca êrîşên li ser Kantona Kobanê şikandina îradeya serbixwe a tevahiya gelê Kurd, ji bo ku gelê kurd di nexşeya rojhilata navînde nebe xwedî  mafê serbixweyiya xwe."

Daxuyaniyê wiha dewam kir: "Em berxwedana gelê Kobanê weke berxwedana tevahiya gelê Kurd dibînin û em van êrîşên li ser Kantona Kobanê weke êrîşeke û plangeriyeke li ser tevahiya gelê Kurd dibînin." Di daxuyaniyê de ev daxwaz li hêzên Kurdistanî hat kirin::

"-Divê ev êrîşên li ser tevahiya gelê Kurd û bi taybetî li ser Kantona Kobanê werin rawestandin û her kes erka xwe a neteweyî ji bo piştgiriya Kobanê ragihîne.

-Divê aliyên siyasî yên Kurdistanê di demeke kurt de dest bi alîkariyeke fîlî ya ji bo Kobanê bikin û amadekariya kongreyeke neteweyî were kirin.

-Pêwîste parlament û hikûmeta Kurdistanê di demeke kurt de dest bi alîkariya ji bo Kobanê bike û her sê Kantonên Kobanê bi awayekî fermî nas bike.

-Pêwîste ambargoya siyasî û aborî ya li ser Kobnê û tevahiya Rojavayê Kurdistanê tavilê bê şikandin."

Daxuyanî li ber dirûşmên "Bijî Berxwedana Kobanê", "Bijî YPG û YPJ", "Bijî Yekîtiya Gele Kurd" û "Helepçe Kobanê ye" bi meşekê bi dawî bû.