Gerîlayê HPG'ê Kaddafî Gulçîmen (Cesûr Erzirom) ku di 14'ê Cotmeha 2012'an de di pevçûneke li navçeya Kemah a Erzînganê jiyana xwe ji dest dabû li navçeya Karaçoban a Erziromê li ser gora xwe hat bîranîn.

Bi sedan Kurdistanî li ber avahiya rêxistina BDP'ê a Karaçobanê hatin cem hev û heta goristanê meşiyan. Di meşê de bênavber dirûşmayên “Şehîd namirin” hatin berzkirin û li goristanê ji bo kesên ku di têkoşîna demokrasî û azadiyê de jiyana xwe ji dest dane rêz hat girtin. Mele Sadrullah Elî li wir axaftinek kir û wiha got: "Em yekem berdêla Karaçobanê bi rêzdarî bi bîr tînin. 30-40 sal berê me nikarîbû bigota em Kurd in lê em niha bi rehetî dibêjin em Kurd in û welatê min Kurdistan e. Welatê Kurdan ji aliyê Ereb, Tirk û Farsan hat parçekirin û her tim Kurd rastî îmha û înkarê hatin. Lê azadî pir nêz e."

Piştre Serokê Rêxistina BDP'ê ya Karaçobanê Siddik Ugur axivî û wiha got: "Em tu caran gerîlayên xwe yên leheng ku ji bo azadiya gelê Kurd û Kurdistanê jiyana xwe ji dest dane ji bîr nakin û nadin jibîrkirin. Ew li çiyayan bi lehengî şer dikin û em ê jî li vir li têkoşîna wan xwedî derkevin. Bi salane Kurd di bin esaretê de rastî zilm û neheqiyan hatin, lê niha pêşiya vê hat girtin. Azadiya Kurdan nêz e. Em şoreşa Rojava û şehîdên Rojava silav dikin."

Merasîma bîranînê bi xwendina dua û dirûşmaya 'Şehîd namirin' bi dawî bû.