Li Amedê, girtiyên ji doza PKK'ê, bi armanca şermezarkirina nêzîkatiyên dewleta Tirk li gelê Kurd ê Rojavayê Kurdistanê û protestokirina girtina deriyên sînor ên di bin kontrola PDK'ê de, di 20-21'ê Tebaxê de ji bo 2 rojan çalakiya grêva birçîbûnê lidar dixin.

Girtiyên ji doza PKK'ê yên li Girtîgeha Tîpa D ya Amedê tên ragirtin, bi rêya malbatên xwe der heqê berxwedan û komkujiya li Rojavayê Kurdistanê daxuyaniyek dan. Di daxuyaniyê de girtiyan destnîşan kir ku şoreşa wan a li Rojava, nîşaneya herî berçav a pêşengiya şoreşa demokratîk a Rojhilata Navîn e. Girtiyan bal kişandin ser tiraqa qirêj a hêzên paşverû û neteperest, olperest ên li Rojhilata Navîn a li dijî gelê Kurd û diyar kirin ku ev tifaqa qirêj bi komkujiyên hovane, êrîş û komployan dixwaze şoreşa Rojava bifetisîne.

Girtyan destnîşankirink u bi berxwedana lehengî ya PYD û YPG'ê, ev êrîş hatine pûçkirin û Rojava bi vê sekna xwe nîşan daye ku pêşengiya şoreşa demokratîk a Rojhilat Navîn dike.

Di daxuyaniya girtiyan de, piştgiriya Tirkiyê ya ji bo çeteyên El Nûsra ku jin zarok, kal, pîr bi awayekî kovane dikuje, bi tundî hat şermezarkirin û hat gotin, "Girtina deriyên sînor ên ji aliyê PDK'ê ve, ne li gorî polîtîkayên yekitî û helwesta netewî ne." Girtiyan ev helwesta PDK'ê bi tundî şermezar kirin.

Girtiyên ji doza PKK'ê bi armanca şermezarkirina êrîş û ambargoya li ser Rojavayê Kurdistanê dan xuyakirin ku ewê di 20-21'ê Tebaxê de ji bo du rojan grêva birçîbûnê pêk bînin.

Di dawiya daxuyaniyê de girtiyan bang li gelê Kurd û hemû hêzên demokrat û şoreşger ên Tirkiyê kirin ku xwedî li şoreşa Rojava derkevin.