Heyeta Komîteya Amadekar a Kongreya Neteweyî ya Kurd ku piştî Dêrikê derbasî herêma Girkê Legê û li herêma şer lêkolîn kirin, rastî gulebarana çeteyan hat. Li ser vê yekê hêzên YPG'ê bersiva tund da û 2 tangên êrîşkaran hatin derbkirin.

Heyeta Komîteya Amadekar a Kongreya Neteweyî ya Kurd piştî lêkolînên xwe yên Dêrikê, derbasî bajarê Girkê Legê bû. Endamên heyetê li vir destpêkê li cihên ku teqîn lê çêbûne lêkolîn kirin û piştre derbasî gundê Rêmala Paşa ku dikeve başûrê Girkê Legê û demek beriya niha komên çete êrîş kiribûn, bû.

Dema heyetê li gund lêkolîn dikirin, komên çete ji derdora gundê Yusufiyê bi çekên giran û karnasan gule li wesayîtên heyetê reşandin. Li ser vê yekê hêzên YPG'ê bersiveke tund da û pevçûn derketin.

Hate ragihandin ku pevçûn ji gundê Mazlûma û Taya yên Tirbespiyê heta gundên Siwêdiyê, Yusufiyê û Sefa yên Girkê Legê li herêmek berfireh dom dikin. Li gorî agahiyên hatine bidestxistin, di pevçûnên li dora gundê Yusufiyê û Sefa 2 tangên êrîşkaran hatin derbkirin û li qada şer mane.

Di pevçûnên serê sibehê yên gundê Sefa de jî tangek hatibû rûxandin.

Li aliyê din endamên heyetê jî piştî pevçûn destpê kirin, vegeriyan Girkê Legê û bi saziyên sivîl re hevdîtin pêk anîn.