Ji bo siyasetmedarên Kurd serbest bên berdan li navçeya Dêrika Mêrdînê çalakiya Pêncşema Reş hat li darxistin.

Ji bo siyasetmedarên Kurd serbest bên berdan her hefte çalakiyên Pêncşema Reş tên lidarxistin û vê hefteyê jî berdewam kirin. Di çalakiya Pêncşema Reş ya li Dêrikê posterê şaredara Dêrikê ya girtî Çaglar Demîrel hat vekirin û pankarta "Vîna me rûmeta me ye, rûmeta me sedema jiyana me ye" hat vekirin. Di çalakiyê de dirûşma "Bijî berxwedana Rojava" hat qîr kirin.

Wekîlê şaredarê Dêrikê Dogan Ozbahçecî axivî û wiha got: "Berxwedana ku di pêşengiya YPG'ê de li Rojava tê meşandin dê teqez bi serkeftinê encam bibe. Şerê ku li Rojava didome, şerekî di navbera YPG'ê û çeteyan de nîne. Ev şer di cewherê xwe de, li hember vîn, înkar, tunebûn û bêstatûbûna kurdan e. Statû û serkeftina ku li Rojava bê bi destxistin, dê bandorê li ser perçeyên din jî bike. Ji ber vê yekê, divê hemû Kurd, sazî û partî piştgiriyê bidin şoreşa Rojava, ev ji bo hemû kurdan peywir û berpirsyarî ye."

Piştî daxuyaniyê 5 deqîqe çalakiya rûniştinê hat lidarxistin.