Aktîvîstên Meclîsa Ciwanan BDP'ê, bi meşekê komkujiyên li Rojava şermezar kirin. Ciwanan dan xuyakirin ku şoreşa Rojava bi karektera xwe ya îdeolojîk re şoreşeke ciwanan e û destnîşan kirin, ku xwedîderketina li Rojava sedema hebûna ciwanan e.

Li Edenê, aktîvîstên Meclîsa Ciwanan a BDP'ê bi armanca şermezarkirina şermezarkirina komkujiyên li Rojava rû didin, li kolana Cuma Pazari ya Taxa Yûnûs Emre ya navçeya Yuregîr a Navenda Edenê hatin cem hev. Di meşa ciwanan de, Serokê Rêxistina BDP'ê ya Navçeya Yuregîrê Mehmet Bayram û rêveberên bajar û navçeyên Edenê yên BDP'ê amade bûn.

Ciwanan pankarta bi nivîsa "Destê xwe ji dîroka me, çanda me, zimanê me û destê xwe ji Rojava vekişînin" vekirin û heta Taxa Anadolû meşiyan. Ciwanan di meşê de aleke mezin a PKK'ê vekirin û dirûşmên "Bijî Berxwedana Rojava", "Bijî YPG", "Şehîd Namirin" û "PKK gel e gel li vir e" qîriyan. 

Jinên pîr ên rengên kesk, sor û zer hilgirtin, bi tililî û çepikên xwe bêdengiya şevê zindî kirin. Welatiyên li rêgeha meşê rûdiniştin jî derketin şaneşînên xwe û bi çepikan piştgirî dan ciwanan. Piştî meş temam bû, ciwanan ji bo bîranîna têkoşerên di rêya azadî û demokrasiyê ya Kurdistanê de jiyana xwe ji dest dane, deqeyek rêz girtin.

'ŞOREŞA ROJAVA ŞOREŞEKE CIWANAN E'

Dûre aktîvîstê ciwanan ê BDP'ê Emrah Ûgûrlû daxuyaniya çapemeniyê xwend. Ûgûrlû bal kişand ser komkujiyên li Rojava rû didin û destnîşan kir ku bi karektera xwe ya îdeolojîk û bi asta xwe ya berxwedanê re şoreşa Rojava beriya her tiştî şoreşeke ciwanan e.

Ûgûrlû diyar kir ku tê xwestin, şoreşa hemû çînên bindest, çand û gelan bi komkujiyan bê astengkirin û got, "Hêza navendî rêxistinkirina çeteya El Nûsra û qada plansaziya êrîşên li dijî Rojava, deshilatdariya AKP'ê ye. Bi ambargo û komkujiyan re tê xwestin, vîna gelê bindest a piştî sedan salan yekemcar di sedsala bîst û yekan de şewq dike, bifetisînin. Ev êrîş li dijî gel û ciwanên Kurd e. Lewma ciwanên Kurd, dê xwedîderketina li şoreşa rojava weke sedema hebûna xwe bibînin û di oxira vê de bi her awayî berdêlan bidin. Em dixwazin bi awayekî zelal bînin ziman; her operasyoneke çeteyên mîna El Nûsra, ne tenê li Rojava li Tirkiye, Iraq û Sûriyê rastî nerazîbûna tevahiya Kurdan tê." 

Ûgûrlû di daxuyaniya xwe de, êrîşa li dijî "Goristana Şehîdan a Egîd Sûrûç" a li ser Çiyayê Bagokê jî, bi tundî şermezar kir.

Bi xwendina metna çapemeniyê re, çalakî bi dirûşme û çepikan bi dawî bû.