Êrîşên komên çete ên Artêşa Azad li dijî taxên kurdan ên Helebê dewam dikin. Hate hînbûn ku komên çekdar di êrîşan de çekên giran û tang bikar anîne. Li gorî agahiyan di encama êrîşan de 3 welatiyên sivîl jiyana xwe jidest dane û 3 jê zarok bi giştî 11 sivîl birîndar bûne. Her wiha di pevçûnan de 25 çete hatine kuştin, gelek birîndar bûne û 9 çete dîl ketine destê YPG’ê. Hêzên YPG’ê wesayîtek doçka li ser ruxandin û 3 baregehên komên çekdar bi dest xistine.

Duh di saetên nîvro de komên çete ên girêdayî Xalid Heyanî, Lîwai Selah El-Dîn, Rebîi El-Erebî (Buhara Ereban) û çeteyên ser bi partiya azadî (Mistefa Cuma) bi çekên giran û tangan êrîşî taxên Şêxmeqsûd, Eşrefiyê, Seken Şebabî û Şiqêf  ên Helebê kirin. Di encama bersivdayîna şervanên YPG’ û Eniya El-Ekrad de pevçûn bi dijwarî rûdan. Pevçûn hîn dewam dikin.

Hate gotin tabûrên Lîwai Ensar El-Îslam û Lîwai Şuhedai Sûriya jî duh di saetên êvarê de tevlî êrîşan bûne. Li gorî agahiyên ku hatine bidestxistin di pevçûnan de 25 çekdar hatine kuştin, gelek birîndar bûne û 9 çete dîl ketine dest. Li aliyê din jî hêzên YPG’ê wesayîtek doçka ya êrîşkaran ruxandin û 3 baregehên çeteyên Xalid Heyanî yên taxa Seken Şebabî xistine dest.

LI HEMBER YPG’Ê TÊK DIÇIN, ÊRÎŞÊ SIVÎLAN DIKIN

Êrîşkarên ku li ber berxwedana hêzên YPG’ê û Eniya El-Ekrad nikarîbûn pêşbikevin û windahiyên mezin dan bi hawanan taxên kurdan topbaran kirin û di encamê de welatiyê bi navê Mistefa Ibrahîm Xelîl, Edîb Hetal Mihemed û Zuhêr Sîdo jiyana xwe jidest dan. Her wiha 3 jê zarok bi giştî 11 sivîl birîndar bûn.

Li Gorî agahiyên hatine bidestxistin komên çete ên bi navê Lîwai Şuhedai Sûriya ya girêdayî kesê bi navê Ebû Behrî û Lîwai Ensar El-Îslam ku duh di saetên êvarê de tevlî şer bûn, piştgiriya êrîşkaran dikin û ji aliyê Sika Tirênê û Bustan Başa êrîşî taxa Şêxmeqsûd dikin.  Komên êrîşkar di nava hewldanan dene ku qadên şer fireh bikin û ji aliyê gundê Beno ve êrîş pêk anîn.

Komên çete ên ku êrîşî taxên kurdan dikin li ber berxwedana hêzên YPG’ê û Eniya El-Ekrad nikarin pêşbikevin bi hawanan êrîşî taxên kurdan dikin.

Pevçûnên li herêmê hîn bi dijwarî didomin.