HPG'ê da xuyakirin ku artêşa Tirk duh bi piştgiriya kobrayan li bejahiya navçeya Colemêrg Şemzînanê derketiye operasyonê. HPG'ê ragihandin ku hejmara leşkerên li qereqola Kilik a Kerboranê jî hatiye zêdekirin û li herêmê cerdevan jî tev li kemînan dibin.

Navenda Ragihandin û Çapemeniyê ya HPG'ê der barê liv û tevgera leşkerî ya li Bakurê Kurdistanê de daxuyaniyeke nivîskî weşand.

Di daxuyaniya HPG'ê de hat ragihandin ku bi piştgiriya helîkopterên kobra duh li bejahiya navçeya Colemêrg Şemzînanê operasyonekê destpê kiriye û ev agahî hat dayîn: "Roja 30'ê Îlonê saet di 04:00 de li derdora gundê Gelîşîm ê ser bi Şemzînanê, 150 leşkerên ser bi artêşa TC a dagirker li qadên Bogaza Tehta Sila û Tepê Kanalan, li gel piştgiriya helîkopterên kobra derketine operasyonê û nîvro xwe ji herêmê vekişandine."

Di daxuyaniyê de der barê kemîn û veguhastina leşkerî ya li navçeya Mêrdîn Kerboranê de jî agahî hatin dayîn.

"Di navbera 29'ê Îlon û 1'ê Cotmehê de li qadên Berizivê, Germaro, Deraca û Miştê yên ser bi navçeya Mêrdîn Kerboranê, bi piştgiriya cerdevanan kemînên artêşa TC a dagiker dewam dikin. Dîsa, cerdevanên ji gundê Kerbend û Girê jî tev li van kemînan dibin. Her wiha bi maşînên zirxî artêşa Tirk leşker veguhast qereqola Kilikê."