Bi armanca şermezarkirina êrîşên çeteyan ên li dijî Rojavayê Kurdistanê, li navçeya Silêmaniye Seydsadiqê meşek hat lidarxistin.

Bi armanca şermezarkirina êrîşên li Rojava, girtina deriyê sînor ê Sêmalka û piştgiriya bi gelê Kurd li Rojavayê Kurdistanê re, bi pêşengiya Partiya Çareseriya Demokratîk PÇDK’ê, rewşenbîr, nivîskarên rojnameyan û gelek rêxistinên civakî yên sivîl, danê êvarê li navçeya Seydsadiq a Silêmaniyê, meşeke girseyî hat lidarxistin. Bi sedan welatiyên beşdarî çalakiyê bûn, pankartên bi nivîsa "Em komkujiya li Rojavayê Kurdistanê lanet dikin" û "Bijî berxwedana YPG'ê" hildan.

Li dû meşê, li ser navê beşdaran rojnamevan Zana daxuyaniyek da û bal kişand ser planên zirav ên komkujiya li dijî Kurdan ên li Rojavayê Kurdistanê. Zana got, "Em weke komek ji rojnamevan û aktîvîsên medenî yên li navçeya Seydsadiqê bi hestiyariya Kurdewar û netewî, van komkujî, êrîş û girtina deriyê sînor bi tundî şermezar dikin û bang li Hikûmeta Herêmê dikin ku di demeke zûtirîn de deriyê sînor veke û bi awayekî kirdarî alîkariya Rojavayê Kurdistanê bike."

Di dawiya peyamê de hate gotin: “Em nefret li şerê ku îro li ser birayên me ên kurd de, li Rojavayê Kurdistanê dikin û em wan êrîşên ne mirovane bi tundî şermezar dikin”.

Di dawiyê de girseya ku beşdarî meşê bibûn ji bo şeremezarkirina êrîşên li ser gelê me ê Rojava, ji kamerayên me re wiha axifîn.