Bi dirûşmeya 'Hebûna Kobanê hebûna Kuridstanê ye' Bi dehan welatiyên bajarê Tirbespiyê, endamên Partiya Yekîtiya Suryanî û Rêxistina Asûrî xwepêşandaneke girseyî lidar xistin û gotin ku YPG'ê rûmeta wan diparêze.

Ji bo şermezarkirina êrîşên çeteyên DAIŞ'ê yên li dijî Kobanê û silavkirina berxwedana bêhempa ya şervanên YPG'ê Tevgera Ciwanên Şoreşger a bajarê Tirbespiyê xwepêşandek lidar xistin û bang li hemû welatiyan kir ku tevlî bibin.

Li ser vê yekê bi dehan welatiyên bajar, endamên Partiya Yekîtiya Sûryanî û Rêxstina Asûrî ya Demokaratîk li pêşiya Navenda Tevgera Ciwanên Şoreşger kom bûn.

Xwepêşanvan di nava bazar û kolanên sereke yên bajar re derbas bûn. Welatiyan milên xwe hildan û alên Kurdî, wêneyên Rêberê Gelê Kurd Abdulllah  Ocalan û pankartên, "Kobanê keleha berxwedanê ye", "Hebûna Kobanê hebûna Kurdistanê ye" û "YPG/YPJ'ê rûmeta me diparêze" bilind rakirin.

Girseya gel ku Suryanî û Asûrî di nav de bû dirûşmayên silavkirina berxwedana Kobanê û şermezarkirina DAIŞ'ê û hevkarên wê  vegotin. Welatiyan gotin ku ew bi hemû hêz û derfetên xwe li rex gelê Kobanê ne.

Di xwepêşandanê de Endamê koordînasyona Tevgera Ciwanên Şoreşger Hemze Tolhildan, endama Rêxistina Yekîtiya Star Roj Mihemed û ji rêveberên tevgera ciwanan Demhat Cûdî axivîn. Axaftvanan piştgiriya xwe ya bi Kobanê re anîn ziman û wiha gotin: "Kobanê ne pariyekî hêsan e. Wê her kes ji bo wê can û xwîna xwe feda bike."

Xwepêşandan li pêşiya konê sersaxiyê yê têkoşer Ebdurehman bi dawî bû.