Li Tirkiyeya ku Tayyîp Erdogan dersa hilbijartî ya Kurdî weke "gava dîrokî" pêşkêş kir, dibistanên wê perwerdeya bi zimanê Kurdî bidan rojekê jî nehatin tehemûlkirin. Dibistana Seretayî ya Ferzad Kemanger a îro li Amedê hat vekirin, ji aliyê polîsan ve hat girtin.

Dibistana Seretayî ya Ferzad Kemanger a bi pêşengiya Kurdî Der, TZP Kurdî û Egîtîm Senê li Amedê hat vekirin, li dû biryara lêpirsînê ya Dozgeriya Komarê ya Amedê, hat morkirin.

Di roja destpêkê ya sala 2014-2015 a hîndekariyê de zarokên Kurd daxwaza ji bo perwerdeya bi zimanê dayikê anîn ziman û dibistanên dewletê boykot kirin. Li Amed, Cizîr û Geverê jî, 3 dibistanên bi perwerdeya bi zimanê Kurdî hatin vekirin.

Li Dibistana Seretayî ya Bêrîvan a Cizîrê, li Dibistana Seretayî ya Dayika Uveyş a Geverê û li Dibistana Seretayî ya Ferzad Kemanger a Amedê, hînê zarokan dest bi dersê nekirin dadgeriya Tirk ket nava tevgerê. Dozgeriya Komarê ya Amedê di çarçoveya xalên TCK yên "Bê destûr saziya perwerdeyê hatiye vekirin" û "Li ser navê rêxistinên sûc hatiye kirin" lêpirsîn da destpêkirin.

Heman piştî lêpirsînê, bi sedan polîsên fermî û sivîl bi maşînên zirxî û TOMA'yan avêtin ser dibistanê û mora girtinê lê dan.

Rêveberên dibistanê, xwendekar û malbatên xwendekaran li hewşa dibistanê çalakiya rûniştinê dan destpêkirin.