NÇR-HPG’ê aşkera kir ku di şerê 17’ê Îlonê yê li herêma gundê Herdan ê girêdayî Şengalê di navbera hêzên gerîla û çeteyên DAIŞ de derket, 2 gerîlayan jiyana xwe ji dest dane. Gerîlayên jiyana xwe ji dest dane Ayşe Elban (Armanc Perman) û Şaban Nardan (Ronî Avaşîn) in.

Navenda Çapemenî û Ragihandina HPG’ê (NÇR-HPG) di daxuyaniya nivîskî ya weşand de diyar kir ku di şerê 17’ê Îlonê saet 19.00’an li herêma gundê Herdan ê girêdayî Şengalê navbera hêzên gerîla û çeteyên DAIŞ de derket 2 gerîlayan jiyana xwe ji dest dan.

Di daxuyaniya NÇR-HPG’ê de wiha hat gotin: “Hevalên me Armanc Perman (Ayşe Elban) û Ronî Avaşîn (Şaban Nardan) ên ku di nava refên têkoşîna azadiyê de cihê xwe girtin û bi îrade û fedakariyeke mezin têkoşîn pêş xistin, li Şengalê li dijî komkujiyên çeteyên DAIŞ ên li hemberî gelê me pêk tîne têkoşîneke mezin a bi lehengî meşandin. Dilsoziya me ya bi bîranîna wan re wê soz û çalakiya me ya di têkoşîna berxwedanê de be.”

Nasnameya gerîlayên jiyana xwe ji dest dane wiha ye:

Ayşe Elban (Armanc Perman) di sala 1986’an de li Mêrdînê hatiye dinê û di 17’ê Îlona 2014’an de li Başûrê Kurdistanê Şengalê jiyana xwe ji dest da.

Şaban Nardan (Ronî Avaşîn) di sala 1993’an de li Sêrtê ji dayik bû û 17’ê Îlona 2014’an li Başûrê Kurdistanê Şengalê jiyana xwe ji dest da.