Tevî ku hêzên YPG’ê ji bo Cejna Qurbanê bêçalaktî îlan kiribû jî, komên çete yên Dewleta Îslamî ya Iraq-Şamê li herêma Çilaxa û Serêkaniyê êrîşî pêk anîn. Hate ragihandin ku di pevçûnên herêm Çilaxa de gelek kuştî û birîndarên komên çete çêbûne, tangek wan hatiye derbkirin.

Li gorî agahiyên ji herêmê hatin bidestxistin, îro saet di 06.30’an de komên çete yên Dewleta Îslamî ya Iraq û Şamê (DAIŞ) êrîşî bendên kontrolê yên YPG’ê yên li gundên Til Elo, Til Elo Xemir, Xerab Bajar û Tahûnê yên herêma Çilaxa ya girêdayî bajarê Girkê Legê kirin.

Hate gotin ku li ser vê yekê hêzên YPG’ê jî bersiv dane û pevçûnên dijwar qewimîne. Hate hînbûn ku di encama pevçûnên ku hîn didomin de bi dehan kuştî û birîndarên komên çekdar çêbûne, her wiha tangek wan hate derbkirin.

Li Serêkaniyê jî komên çete yên Dewleta Îslamî ya Iraq-Şamê şevê din ji aliyê bajaroka Til Xelefê êrîş pêk anîn, lê rastî bersivdayîna şervanên YPG’ê hatin.

Hate gotin ku li herêmê şerekî dem kurt derketiye û kom neçar mane ku paşve biçin. Der barê encamên pevçûnê de agahiyên zelal nehatin bidestxistin.