Partiya Yekîtiya Demokratîk (PYD) komkujiya li herêma Xûta ya paytexta Sûriyê Şamê ku hate gotin çekên kîmyewî hatine bikaranîn, şermezar kir û bang li saziyên navneteweyî kir ku der barê mijarê de lêpirsînê bidin destpêkirin û berpirsên komkujiyê radestî Dadgeha Bilind a Navneteweyî bikin.

Desteya Rêveber a PYD’ê der barê komkujiya li Şamê hate pêkanîn û êrîşên komên çete yên li ser Rojavayê Kurdistanê de daxuyaniyek nivîskî weşand. Di daxuyaniyê de hate diyarkirin ku ji sal û nîvekê ve şoreşa Sûriyê veguheziye şîdetê û ji bo gel metirsiyên mezin derketine holê.

Di daxuyaniyê de hate destnîşankirin ku bikaranîna madeyên kîmyewî li herêma Xûta Şerqî û kuştina sivîlan, pêkanînek hovane ye û li dijî şoreşa Sûriyê ye. Di berdewama daxuyaniyê de komkujî hate şermezarkirin û ev tiş hatin gotin: "Em bang li rêxistinên hiqûqî yên navneteweyî dikin da ku lêpirsînê bidin destpêkirin û kujeran radestî Dadgeha Bilind a Navneteweyî bikin."

Di daxuyaniyê de êrîşên komên çekdar ên li dijî herêmên Rojavayê Kuridstanê jî hatin bibîrxistin û wiha hat domandin: "Di dema ku şoreşa gelê Sûriyê di xizmeta welatiyan de ber bi çareseriyê ve diçe de, em dibînin komên çekdar û rêjîma Baas şerê li Sûriyê tînin herêmên Rojavayê Kurdistanê ku wekî cihê herî bi ewle dihate zanîn, her wiha bibû wargeha aramiyê ya hezaran welatiyên Sûriyê ku ji ber zulm û terorê reviyabûn."

Di berdewama daxuyaniyê de hate destnîşankirin ku êrîşên li dijî van herêmên bi ewle wekî êrîşên li dijî hemû şoreşa Sûriyê ne û wiha hate gotin: "Hêzên mîna Erebîstana Siûdî, Qeter û Tirkiyê ku piştgiriya komên çekdar dikin, şirîkên rijandina xwîna gelên Sûriyê û Kurda ne. Li aliyê din jî rêjîma Baas ku bajarê Dêrikê bombebaran kir, piştgiriya xwe ya ji komên çekdar û Dewleta Îslamî ya Iraq û Şamê nîşan da. Rêjîm û komên çekdar  û alîgirên wan bi vî awayî dixwazin îradeya gelê Sûriyê yê berxwedêr têk bibin."

Di daxuyaniyê de bang li hêzên muxalefetê û Koalîsyona Niştimanî ya Sûriyê hate kirin ku dest ji siyasetên xwe yên şovenî berdin û wiha hate domandin: "Em bang li rayedarên muxalefetê dikin ku daxuyaniyên xwe yên li dijî gelê kurd paş de bikişînin û lêborîna xwe ji gelê kurd bixwaze."

Di dawiya daxuyaniyê de siyaseta şovenî ya rêjîma Baas jî hate şermezarkirin û banga dawîanîna li komkujiyan hate kirin.