Şandeya KCD’ê ku serdanên xwe li Başûrê Kurdistanê didomînin, bi Serokwezîrê Herêma Kurdistanê Nêçîrvan Barzanî re hevdîtin pêk anî.

Şandeya ku ji Hevserokên Giştî yên KCD’ê Aysel Tûglûk û Ahmet Turk û Parlementerê BDP’ê yê Amedê pêk dihat, li mala Nêçîrvan Barzanî ya li Selehedînê hevdîtinek pêk anîn. Piştî hevdîtina ji çapemeniyê re girtî, Nêçîrvan Barzanî û Ahmet Turk daxuyanî dan çapemeniyê.  Turk bi bîr xist ku ev çend roj in li Başûrê Kurdistanê hevdîtinan pêk tînin û bal kişand ser girîngiya piştgiriya partiyên siyasî yên Kurd.

Ahmet Turk got. “Lê bi awayeke yek alî aşitî nabe” û wiha domand: “Helbet gelê me carna bi fikar nêzîkê pêvajoyê dibe. Ji bo projeyên ku divê bên aşkerekirin û dê çi bê kirin, gelê me di nava bendewariyê de ye. “

Ahmet Turk da zanîn ku pêvajo bi awayeke yek alî pêş nakeve û xwest her du alî pêngavan biavêjin.  Turk diyar kir ku li aliyekê ji bo aşitiyê hevdîtin tên kirin û li aliyeke din jî Qendîl tê bombebaran kirin û got: “Ev yek jî zererê dide baweriya ji bo çareseriyê.”

Serokwezîr Nêçîrvan Barzanî jî diyar kir ku ew pêvajoya hevdîtinan a bi Rêberê Gelê Kurd Abdullah Ocalan re hatiye desptêkirin destek dikin û got ku rola ku bikeve ser milê wan ew ê pêk bînin.