Heyetek ji Şaredariya Bajarê Efrînê, îro çû serdana Şaredariya Sûrê ya Bajarê Amedê. Di serdanê de rewşa Efrîn û herêmê hatin nirxandin û li ser rê û rêbazên alîkariyê hat rawestîn. 

Heyek ji Şaredariya Bajarê Efrînê ya Rojavayê Kurdistanê, bi armanca ragihandina rewş û pirsgirêkên xwe, îro çû serdana Şaredariya Sûrê ya Amedê. Heyet ji aliyê alîkarên Şaredarê Sûrê Mehmet Alî Altinkaynak, Azîze Deger, Kemal Guler û Cîgirê Şaredar Neqşî Sayar ve hat pêşwazîkirin. Di destpêka serdanê de endamê heyeta Şaredariya Efrînê Endezyar Şoreşvan Alî mafê axaftine wergirt, û zor û zehmetiyên gelê Efrînê vegot.

Alî anî ziman ku ji bilî êrîşên komê çete û ambargoya ku li ser gelê Efrînê hatiye kirin, gel ji ber koçberiya zede ya ji bajarê Helebê, ketiye rewşeke gelekî zor û zehmet. Paşê jî endamê meclîsa Şaredariya Efrînê Esed Elo jî zehmetiyên ji ber kêmbûna av û elektrîkê anî ziman û got ku rewşê bajêr gelekî zehmete û ji ber ku dewlet alîkariyê nade Şaredariyê ew nikarin bi rêk û pêk xizmetan ji gel re peşkeş bikin û di warê xizmetan de kêm dimînin. 

Endezyara Mîmar Nesrîn Reşo jî rewşa gel a ji ber ambargoyê de anî ziman û got: "niha hewcedarî bi madeyên sereke yên wekî şîrê zarokan û dermanan heye." Her wiha anî ziman ku divê ev ambargoya li ser bajarê wan bi rengekî bê hilanîn û divê di vî warî de hemû dezgeh û saziyên kurdan ên bakur bikaribin zextekê li hikûmeta Tirk bikin da ku vê ambargoyê têk bibin û deriyekî sînor veke. 

Cîgirê Şaredar Sûrê Neqşî Sayar jî di hevdîtinê de xêrhatina mêvanan kir û anî ziman ku ew ji nêz ve rewşa Rojava dişopînin û ew amade ne ji bo bi her awayî piştevaniya gelê xwe yê Rojava bikin.

Heyeta Şaredariya Efrînê, di çarçoveya serdanên xwe yên li Amedê de bi Şaredarê Bajarê Mezin ê Amedê Osman Baydemî û Şaredariyênd in ên bajêr re hevdîtin pêk anî bû.