Bi dijwarbûna şerê li her sê eniyên Kobanê re, girseyên gel ên li ser sînor zincîra ji mirovan çêkirin, berê xwe dan Deriyê Sînor ê Kobanê.

Çalakiya bi hezaran kesên li ser sînor a ji bo xwedîderketina li Kobanê, dewam dike. Bi hezaran kesên bi şev li ser sînor man, danê sibê bi qasî 3 kîlometreyan li seranserê sînor zincîra ji mirovan ava kirin.

Di çalakiya li ser sînor û nobedên berxwedanê de jin pêşengiyê dikin. Jinên ku li ser sînor nuqteyên nobedê çêkirin, bi dûrbînan liv û tevgera herêmê ji nêz ve dişopînin.

LI SÊ ENIYÊN KOBANÊ ŞER Û PEVÇÛN DIJWAR BÛN

Li bin xetê li Kobanê jî, çeteyên DAIŞ'ê duh bi şev careke din ji sê aliyan ve dest bi êrîşan kirin.

Şer û pevçûnên dijwar dewam dikin. Çeteyên DAIŞ'ê her wiha bi top û fîşekan nuqteyên bexwedanê yên li ser sînor jî hedef girtin. Çeteyan top û hawan avêtin gundê Swêdê û Mîrana yên Pirsûsê.

ÇALAKGERÊN NOBEDÊ KETIN NAVA TEVGERÊ

Bi dijwarbûna şer re çalakgerên nobedê jî ketin nava tevgerê.

Girseya gel a li herêmeke ji 30 kîlometreyî ya sînor belav bûye, berê xwe da Deriyê Sînor ê Kobanê. Liv û tevger dewam dike.