Cenazeyê Endama Meclîsa Leşkerî ya YPJ’ê Kedra Erkek (Ronahî Reşo) û cenazeyên şervanên YPG’ê Ebdulselam Silêman ê bi nasnav Welat Êrîş û Zemçî Mihemed ê bi nasnav Tîrêj Rojhilat li bajarê Efrînê, cenazeyên şervanên YPG’ê YPG’ê Xalib Osê û Mistefa Erko Osman jî li Kobanê spartin axê.

Cenazeyên Endama Meclîsa Leşkerî ya YPJ Kedra Erkek û şervanên YPG’ê Ebdulselam Silêman û Zemçî Mihemed ji aliyê hezaran kesî ve ji avahiya Saziya Malbatên Şehîdan a Efrînê hatin wergirtin û bi karwanekî wesayîtan birin Goristana Şehîda Seydo ya li navçeya Cindêrisa Efrînê.

Karwanê cenazeyan li Cindêrisê ji aliyê hezaran kesan ve hate pêşwazîkirin û ji vir jî birin Goristana Şehîd Seydo. Piştî cenaze anîn goristanê merasîm hate lidarxistin. Di merasîma ku bi rêzgirtinê destpê kir de Endama Meclîsa Leşkerî ya YPJ’ê Rojda Efrînî axivî û da zanîn ku ew ê heta dawî li ser xeta parastina rewa israr bikin. Li ser navê TEV-DEM’ê Ferhad Dêrik jî axivî û diyar kir ku gelê kurd dê ji  destkeftiyên xwe hemû berdêlan bide.  Li ser navê Desteya Bilind a Kurd Reşîd Şeban, li sernavê Saziya Malbatên Şehîdan Xelîl Ecîl jî axivîn û bal kişandin berxwedana hatiye nîşandan.

Piştî axaftinan cenazeyên şervanên YPG/YPJ’ê bi diruşmeyan spartin axê.

Li Kobanê jî cenazeyê şervanê YPG’ê Xalib Osê yê ku di pevçûnên gundê Sûsik de jiyana xwe ji dest da û şervanê YPG’ê Mistefa Erko Osman ê ku di encama qezaya tirafîkê de jiyana xwe ji dest da spartin axê.

Cenazeyên 2 şervanên YPG’ê ji avahiya Saziya Malbatên Şehîdan a Kobanê hatin wergirtin û bi karwanekî wesayîtan birin Goristana Şehîdan a li gundê Termik. Li goristanê merasîmek hate lidarxistin û li ser navê Saziya Malbatên Şehîdan Faris Etiya, li ser navê Pariya Demokrata Kurd/Sûriyê Hogir Kino, li ser navê YPG’ê Şiyar Kobanê û li ser navê PYD’ê Zerdeşt Salih axaftin hatin kirin. Di axaftinan de soza şopandina riya “şehîdan” hate dayîn.

Piştî axaftinan cenazeyên şervanên YPG’ê spartin axê.