Hevserokê Partiya Çareseriya Demokratîk a Kurdistanê (PÇDK) û namzetê lîsteya 113'an Diyar Xerîb, ji bo pêkhatina hilbijartineke demokratîk bang li hikûmeta herêmê kir ku bi erka xwe rabe û pêşî li zext û astengiyan bigire. Xerîb destnîşan kir ku dê PÇDK ji siyaseta li Başûr re nûbûnê bîne.

Hevserokê Partiya Çareseriya Demokratîk a Kurdistanê (PÇDK) û namzetê lîsteya 113 a PÇDK’ê Diyar Xerîb, mijarên hilbijartinên li Başûrê Kurdistanê, rola PÇDK û namzetên lîsteya 113'an daxuyaniya Serokê Herêma Kurdistanê ya li ser endamên lêkolînkirina heyeta Komîteya Amadekar a ji bo Rojavayê Kurdistanê, ji ANF'ê re nirxand.
 
PÇDK WÊ JI SIYASETA BAŞÛR RE NÛBÛNÊ BÎNE!

Hevserokê  PÇDK Diyar Xerîb da xuyakirin ku bernameya wan a hilbijartinê û polîtîkayên wan ên giştî, ji bo pirsgirêkên civakê xwedî çareseriyên maqûl in û got, "Eleqe û baweriya gel a ji rêxistin û partiya me re, partiyên li deshilatdariyê dixe nava tirs û fikaran. Lewma êrîşên li dijî partiya me rû didin. Em ji wan hêzên tarî yên astengiyan derdixînin pêşiya partiya me re dibêjin; emê karê xwe bikin. Ji bo azadiya vî gelî çi pêwîst be emê wê bikin."

Xerîb diyar kir ku êrîş û zextên di dema hilbijartinê de li partiya wan tê kirin, dê bi wan re paşve gav nedin avêtin û destnîşan kir ku astengî rê li ber hêrsa gel vedike û hîn bi hêz xwedî li partî û nirxên xwe derdikeve.

Xerîb ragihand ku wan li beramberî êrîşan li Dêrelok, Zaxo û Şêledizê xebatên xwe yên hilbijartinê xurtkir kirine û got, "Bi biryardarî me karê xwe meşandin. Di encamê de jî êrîşkar hatin teşhîrkirin. Li Ekrê, Sidekan û Çomanê jî heman tişt pêk hatin û me jî bi heman rengî bersiv dan."
Li Ekrê, Sidekan û Çoman ji heman tişt hatin pêk anîn lê me bi dîsa bi eyni şeklî bersiv da û ji niha şundejî emê bi wî şeklî berdevamkin. 

JI BO HILBIJARTINEKE DEMOKRATÎK DIVÊ HIKÛMET ERKA XWE BICIH BÎNE

Hevserokê PÇDK'ê û namzetê lîsteya 113'an Diyar Xerîb ji bo pêkhatina hilbijartineke serketî û demokratîk bang li Serokatiya Herêmê, Hikûmetê û Asayîşê kir ku serî li fen û rêyên cuda nedin û got, "Erka hikûmetê ew e ku bi bêalî nêzî pêvajoya hilbijartinê bibe. Divê hêzên asayîşê jî li gorî qanûnan tevbigerin û bi partîzanî nêzî xebatên hilbijartinê nebin."

Xerîb bang li xebatkar û alîgirên xwe jî kir ku bi erka xwe rabin û xwe nexin nava pevçûn û nerehetiyan. Xerîb destnîşan kir ku divê hemû xebatkarên wan bi şêwaz û zimanekî medenî xebatên xwe yên kampanya hilbijartinê bidomînin, da ku naveroka hilbijartinê neyê valakirin.

Hevserokê PÇDK'ê Diyar Xerîb ji gelê Kurd ê li Başûrê Kurdistanê jî xwest ku di roja hilbijartinê de kes li malê nemînin, biçin ser sindoqan û bi vîna xwe ya azad dengê xwe bikar bînin. 

Hevserokê Partiya Çareseriya Demokiratîk (PÇDK)  û namzetê lîsteya 113'an a PÇDK’ê Diyar Xerîb bal kişand ser cihêkariya di nava civakê de li jinan tê kirin û destnîşan kir ku di proje û bernameya xwe de giranî didin wekhevî û hevsengiya navbera jin û mêr a di her qadên jiyanê de.

DAXUYANIYA BARZANÎ NE DI CIH DE YE

Hevserokê PÇDK’ê Diyar Xerîb der barê daxuyaniya Serokê Hikûmeta Herêma Kurdistanê Mesûd Barzanî ya li ser Komkujiya Rojava de wiha got: “ Ev daxuyaniya Barzanî ne di cih de ye. Heyetek ji Komîsyona Amadekar a Kongreya Neteweyî ya Kurd çû cihê bûyerê û komkujî piştrast kir. Her wiha vê komkujiyê bi rojan di çapemeniyê de cih girt." Xerîb destnîşan kir ku israra Barzanî ya li ser îdîaya pêknehatiyê, rê li ber komkujiyên nû vedike.