Yekîneyên Berxwedana Mexmûr têkildarî encamên operasyona li herêma Mexmûr a 5 gundên ku ji çeteyan hatin paqijkirin aşkera kir. Di operasyonê de 20 çete hatine kuştin û gelek alavên leşkerî û cebilxane hatine desteserkirin. Di operasyonê de 3 gerîlayan jî jiyana xwe ji dest dane.

Encamên operasyona duh êvarê li herêma Mexmûr destpê kir û heta danê sibehê dewam kir hatin aşkerakirin.

Li gor daxuyaniya Yekîneyên Berxwedana Mexmûr  ji duh danê êvarê ve li hemberî gundên Leçeka, Mehmudiye, Xirbanê, Reşîdiye û Fatima yên girêdayî bajaroka Mexmûr û destê çeteyên DAIŞ de bûn operasyonek hatiye lidarxistin.

Di encama operasyona ji aliyê gerîlayên HPG/YJA STAR û pêşmergeyan ve hatin lidarxistin 5 gund ji destê çeteyan hatin rizgarkirin. 20 çete hatin kuştin, gelek wesayîtên leşkerî û cebilxane hatin îmhakirin û gelek ji wan jî hatin desteserkirin.

ALAVÊN HATINE DESTESERKIRIN

Li gor vê alavên hatine desteserkirin ev in:

“8 çekên BKC, 2 B-7 roketavêj, çekek M-16, 7 keleşnîkof, çifteyek, 2 hewanên 60 milîm, 2 hewanên 80 milîm, 14 roketên B-7, 3 haşve yên B-7, 7 guleyên hewanan ên 82 milîm, 26 guleyên hewanan ên 60 milîm, bombeyek destan, 20 şarjorên kleşan, dûrbîneke tangan, 1260 guleyên doçka ên 12.5, bêtêlek, 645 guleyên doçka yên 14.5, 3 dûrbînên bi roj, 4200 guleyên BKC, 5 telefon, 300 guleyên kleşê, 25 roketên hewanan, 3 wesayît (du wesayîtên doçka) û motorsîkletek.”

3 GERÎLAYAN JIYANA XWE JI DEST DAN

Hat ragihandin ku di operasyona Yekîneyên Berxwedanê de 3 gerîlayan jiyana xwe ji dest dan.

Li gor daxuyaniyê gerîlayên jiyana xwe ji dest dane ev in:

“-Avesta Harun Wan,

-Diyar Şerava (Hesen Bodik) di 2010’an de tevlî nav refên HPG’ê bûye, di sala 1987’an de li Şerava ya Efrînê hatiye dinê.

-Siyabendê Zap (Ramazan Akar) di sala 2012’an de tevlî nav refên gerîlayan bûye û di sala 1989’an de li Colemêrgê hatiye dinê.”

Di daxuyaniyê de herî dawî wiha hat gotin: “Em wek Yekîneyên Berxwedana Mexmûr soz didin li hember hemû êrîş û talûkeyên li dijî Kurdistanê heta dawiyê li ber xwe bidin, di rêya hevalên xwe yên şehîd de em ê bimeşin û dilsozê bîranîna şehîdên xwe bin.”