Xebatên hilbijartinê yên Partiya Demokratîk a Gelan (HDP) didomin. Namzetên HDP’ê li taxên Çamlibel, 19’ê Gulan, Gurselpaşa, Akkapî yên navçeya Seyhan û Yuregîr yên Edeneyê serdana gel û dikandaran kir. Gel eleqeyek mezin nîşanî namzetên HDP’ê da û wiha got; “Em dixwazin AKP biçe. Êdî bes e. Ji bo ku AKP biçe em ê dengê xwe bidin HDP’ê.”

LI NAVÇEYÊN MERSÎNÊ SERDANA ESNAF Û KOMELEYAN HATE KIRIN

Endam, rêveber û namzetên HDP'ê yên Mêrsînê jî li navçeyên Tarsûs, Toros, Yenîşehir, Akdenîz û Mezîtlî yên Mêrsînê, esnaf, komele û gel ziyaret kirin û bi wan re sohbet kirin. Namzetên HDP'ê rastî eleqeyek mezin hatin.

HDP’Ê LI ANTALYAYÊ NAMZET DA NASÎN

Rêxistina HDP'ê ya Antalyayê jî li restaûrantek Kaleîçî bername pêk anîn û namzetên xwe bi gel dan naskirin. Gelek nûnerên saziyên civakî û nûnerên partiyên siyasî jî amade bûn. Hevseroka HDP'ê ya Antalya Songul Şarkli, diyar kir ku di şertên newekhev de dikevin hilbijartinê û wiha got: "Ji roja xebatên hilbijartinê hatine destpêkrin heta niha em rastî astengiyan tên. Lê tevî her tiştî hevî û baweriya me zêde ye. Li Antalya 16 namzetên me hene û 8 jê jin in. 25'ê Hezîranê dê ji bo me dîroka serkeftinê be. "

Namzetê parlamenteriyê yê HDP’ê yê Antalyayê Kemal Bulbûl jî got di 24’ê Hezîranê de AKP’ê wê di bin benda ku avakirî de bimîne û wiha domand; “Têkoşîna me têkoşîna kedê ye, têkoşîna azadî, wekhevî û edaletê ye. Em ê wekhevî û yekîtiya gelan ava bikin. Em ê vêya carek din di hilbijartinên 24’ê Hezîranê de nîşan bidin.”

Namzetên parlamenteriyê Denîz Yildirim û Hadî Cin jî qala hevdîtina xwe ya bi namzetê Serokkomariyê yê HDP’ê Selahattîn Demîrtaş kir ê ku li Girtîgeha Edîrne dîl girtiye.

Piştî civînê rêveberên bajar û namzetan çûn serdana kongreya Weqfa Çanda Anadolû ya Hacibektaş ku li Mala Cem a Kizlarik didome.