Saziya mafên mirovan a navneteweyî Medico International, ji bo destekirina mexdûrên şer ên li bajar û navçeyên Bakurê Kurdistanê yên ji aliyê dewleta Tirk ve hatin hilweşandin dimînin, dest bi projeyekê kir. Di çarçoveya projeyê de , ji bo mirovên ku malên wan hatine xerakirin û tevî vê yekê jî cih û warê xwe neterikandine wê destpêkê ji 1000 malbatî re xanî bên lêkirin.

Gelek zanyar, siyasetmedar, nivîskar, rojnamevan û hunermendên li Elmanyayê destekê didin projeyê. Medico International li ser projeyê daxuyaniyek da û diyar kir ku bi hewldana hevpar re mirovan li ser erdê xwe dest bi lêkirina xaniyan kirine. Medico ragihand, alavên ji bo lêkirina xanî wan ji herêmê re şandine û wiha dewam kir: "Tevî hebûna saziyên ewlekariyê yên Tirk û hewldanên çavtirsandinê jî hîmên xaniyan tên danîn û dîwar tên lêkirin."

'TIŞTÊN BI SERÊ KURDAN HATINE ANÎN DIVÊ NEYÊN JIBÎRKIRIN'

Medico International bal kişand ser girîngiya fêhmkirina bi sed hezaran Kurdên ji ber zext û zora dewleta Tirk koçî cihên cuda kirine û bi bîr xist ku zêdeyî 500.000 mirov di şerê çend salên dawî de bê cih û war mane. Di daxuyaniya Medico de ev bang hate kirin:

"Piraniya mirovên bê mal hatine hiştin, ne cara yekê ye ku tiştekî bi vî rengî tê serê wan. Di destpêka salên 1990'î de jî gundên wan hatibûn şewitandin û ev mirov neçar mabûn koçî bajaran bikin. Xisara leşkerî yên heyî bûn sedem ku ev mirov piştî 25 salan ji nû ve koç bikin. Rîsk, tirs û fikarên wê wextê tên dubarekirin."

Kesên ku destek dan bang Medico gotin, divê piştgirî ji projeya ji nû ve avakirinê were dayin û destnîşan kirin ku daxwaza çêkirina xaniyên nû, nîşaneya daxwaza Kurdan a jiyana li Tirkiyeyeke demokratîk û mafê mayina li welatê xwe.

Di daxuyaniyê de hate gotin, "Ev yek jî, mîna projeya çêkirina xaniyên hêviyê, bi hewldanek hevpar, bi naskirina pirrengiya olî û etnîkî ya li nava civakê, bi qebûlkirina cihêrengiyê û parastina azadî û wekheviya her kesî dibe. Ji bo projeyeke bi vî rengî bi cih were anîn, divê destek ji mexdûrên li Tirkiyeyê û cihên din re bê dayin."