Yek ji pêkhateyên damezrîner ên HDP'ê Hevseroka berê ya Partiya Jinûve Rizgariyê ya Sosyalîst (SYKP) Tulay Hatîmogûllari ji HDP'ê bû parlamentera Edeneyê. Çar nasnameyên Hatîmogûllari hene: Ereb, Elewî, Sosyalîst û Femînîst. Hatîmogûllari sala 1977'an li navçeya Samandag a Antakyayê ji dayik bû. Dibistanên seretayî, navîn û lîseyê li Samandagê qedand û ji Fakulteya Aboriyê ya Zanîngeha Anadolûyê mezûn bû.

Di dema xwendina lîseyê de cihê xwe li nava têkoşîna çep-sosyalîst girt. Li dijî asîmîlasyona li nava gelê Ereb, ji bo zindîkirina çand û zimanê Erebî, sala 1995'an bû yek ji damezrîner û rêveberên Kargeha Hunerê ya Çagdaş ku karê muzîk û şanoya Erebî dikir. Bû rêvebera ÎHD'ê ya Şaxê Hatayê, her wiha weke delegeya navenda giştî wezîfe kir. Sala 2000'î ji bo mezinkirina piştevaniya jinê, tevlî karê sazkirin û birêxistinkirina Akademiya Jinê ya AMARGÎ bû. Wekî din tevlî karê rêxistinbûnê yê Kolektîfa Kedê ya Jinê û Meclîsa Aştiyê ya Tirkiyeyê bû.