Hevserokên Meclîsa TEV-DEM’ê yê Amûdê Silêman Şêxê û Fatma Silêman, şervanên YPG/YPJ’ê, nûnerên Kongreya Star, Hevseroka Meclîsa Malbatên Şehîdan Seyîd Ferso, Hevserokê Desteya malbatên Şehîdan Îdan Ebû Mihemed jî di nav de bi sedan şêniyên Amûdê û gundê wê cenazeyê şervanê YPG'ê Nûredîn Loqman(Dilşêr Zap) yê ku di 3'ê Tîrmehê di Pêngava Rizgarkirina  Reqayê de jiyana xwe ji dest dabû, ji Meclîsa Malbatên Şehîdan wergirtin û bi karwanekî wesayîtan  ber bi Goristana Şehîd Îsmaîl ve ketin rê.

Girseya gel li nêzî goristanê bê navber dirûşmeyên 'Şehîd Namirin' berz kirin û darbesta şehîd danîn ser milan û heta goristanê meşiyan. Li goristanê deqîqeyekê rêz ji bo cangoriyên Kurdistanê hat girtin û merasîmeke leşkerî hat lidarxistin.

Li ser navê Desteya Malbatên Şehîdan Îdan Ebû Ehmed axivî û sersaxî ji malbata şehîd Dilşêr û hemû beşdaran re xwest û soza şopandina rêya şehîdan da û got ku azadî bi keda şehîd û şervanan pêk tê.

Di berdewama merasîmê de her wiha li ser navê YPG/YPJ’ê Zelal Amûdê axivî û got ku şervanên QSD’ê ber bi rizgarkirina Reqa de gavan diavêjin û ji bo rizgarkirina sivîlan û parastina herêmê canê xwe feda dikin û wiha got; "Em tu carî şehîdên xwe ji bîr nakin û gotina Rêberê Gelê Kurd Abdulah Ocalan a dibêje jibîrkirin îxanet e, bila bîra me de be."

Di merasîmê de her wiha li ser navê Rêveberiya Xweseriya Demokratîk a Kantona Cizîrê Hevseroka Navenda Çand û Hunerê ya Kantona Cizîrê Ilyas Seydo axivî û berxwedana şervanan ku canê xwe ji bo rizgarkirina herêmê feda dikin bi bîr xist û soz da ku ew ê heta dawî şopdarên rêya şehîdên xwe bin.

Li ser navê malbata Şehîd Dilşêr bavê wî Loqman Yûnis axivî û soz da ku wê heta dawî şopdarên rêya Dilşêr û hemû şehîdên azadiyê bin.

Piştî axaftinan nasnameya şehîd hate xwendin û radestî malbatê hate kirin. Di dawiya measîmê de girseya gel cenazeyê şervanê YPG’ê Dilşêr Zap bi dirûşmeyan li Goristana Şehîd Îsmaîl Hogir veşartin.